股票市場係荷蘭人發明？
（更多歐洲/荷蘭生活資訊，立即到https://www.patreon.com/allyblahblah）
喺今時今日嘅經濟，股票及證券市場已經成為不可缺少嘅一部份。但你又知唔知道，原來股票市場係由荷蘭人發明？
阿姆斯特丹證券交易所 (Amsterdam Stock Exchange) 係目前世界上最古老嘅「現代」證券市場。喺1602年由荷蘭東印度公司 (Dutch East India Company; 荷蘭語 Verenigde Oostindische Compagnie)成立。一開頭只係做股票同債券嘅交易。
咁一開頭開設股票同證券交易市場嘅目的係咩呢？話說喺17世紀嘅時候，荷蘭人係出咗名嘅貿易商同航海家，而阿姆斯特丹又係當時歐洲出咗名最大嘅港口。所以當時荷蘭人就經常利用海路將香料同埋貴重物品由印度帶到阿姆斯特丹。
雖然荷蘭人航海經驗豐富，由印度開船到歐洲嘅「成功率」都只係大約一半左右。對於有錢人來講，偶爾沉一艘船其實好小事；但對於一般生意人/普通人來講，沉船到不得之了啦，成副身家都可以冇晒。後來就有人發明左股票市場，允許每個人購買少量嘅股票，咁樣就唔需要一個人承擔所有損失，以此幫助商人同埋貿易商重建對投資嘅信心。
最開頭嘅阿姆斯特丹證券交易所，就建立喺阿姆斯特丹市中心嘅 Dam Square。原本係一個露天嘅交易市場，後來經過重建。2000年 Amsterdam Stock Exchange 同比利時嘅Brussels Stock Exchange 合併，成為 Euronext Amsterdam。
筆者早兩年有入去參觀過，的確係一棟非常古老嘅建築。話說其中一個大會議廳，好多年前係唔俾女人進入，但好多高層嘅秘書都係女人，結果每次一開會，你有啲秘書就只能夠坐喺會議廳隔離一個好細嘅房，仔細地聽開會內容同埋寫會議紀錄。都真係好誇張呀！
由於英國脫歐嘅關係，2021年頭開始，阿姆斯特丹嘅 Euronext Amsterdam 已經取替倫敦成為歐洲最大嘅證券交易所。雖然法國巴黎、德國法蘭克福、意大利米蘭同埋愛爾蘭都柏林等等嘅金融市場都因為 Brexit 受惠不少，不過好多金融、銀行業嘅生意都過晒嚟阿姆斯特丹。主要原因包括荷蘭人英文好、公司稅務有優惠，同埋好多本身喺倫敦有業務嘅公司都會喺阿姆斯特丹有辦公室。
繼續留意本專頁同Patreon，了解更多歐洲/荷蘭狀況！
（圖二：阿姆斯特丹市中心嘅 Euronext Amsterdam；圖三：Euronext Amsterdam 建築內部［網上圖片］；圖四：17世紀嘅阿姆斯特丹證券交易所［網上圖片］）
@ Amsterdam, Netherlands
Search